Reshjet e orëve të fundit në Kosovë e kanë renduar situatën në Kosovë, sic pohoi edhe vetë kryeministri në detyrë Avdullah Hoti. Shefi I ekzekutivit u shpreh se është informuar nga Qendra e Emergjencave se reshjet e fundit kanë çuar në bllokime rrugësh e kanë bërë që disa lumenj të dalin nga shtrati. “Sipas këtij raporti gjendja paraqitet e rënduar me vërshime uji, dalje nga shtrati i disa lumenjve dhe rrëshqitje të tokës”, thuhet në një njoftim të zyrës së tij. Megjithatë, Hoti shprehet se për momentin, gjendja po menaxhohet mirë nga mekanizmat lokalë” dhe nuk ka pasur asnjë kërkesë nga ana e tyre ku të dërgojnë mbështetjen e Qendrës së Situatave të Këshillit të Sigurisë. Instituti Hidrometeorologjik i Kosovës një ditë më parë njoftoi se të premten dhe të shtunën do të ketë reshje shiu dhe bore. Si pasojë e reshjeve të borës dhe shiut, gjatë janarit, disa komuna të Kosovës u përballën me përmbytje. Komunat kanë nisur tashmë vlerësimin e dëmeve me qëllimin që banorët e prekur, të kompensohen. Për këtë qëllim, Qeveria në detyrë e Kosovës ka ndarë rreth 1 milion euro.