Me 67 vota, parlamenti 120 vendesh i Kosovës, miratoi në një seancë të jashtëzakonshme qeverinë e re të Kosovës, që do të drejtohet nga kryetari i lëvizjes Vetëvendosje, Albin Kurti, partia e të cilit doli fituese në zgjedhjet e 14 shkurtit. Kurti që të mërkurën mbush 46 vjec, behet kështu për herë të dytë kryeministër pasi e mbajti një herë këtë post në 2020-tën, në qeverinë e koalicionit me Lidhjen Demokratike të Kosovës. Ajo qeveri do të ishte dhe ekzekutivit më jetëshkurtër në Kosovën e pasluftës. Përballja me pandeminë e COVID-19, dallimet rreth qasjes së institucioneve ndaj saj dhe posaçërisht mospajtimet rreth qasjes ndaj bisedimeve me Serbinë, u shndërruan në shkas lufte politike dhe më 25 mars ajo u rrëzua më një mocion mosbesimi të ngritur nga Lidhja Demokratike. Në fjalimin e tij në parlament, Kurti tha se prioritet e qeverisë së tij të re do të jenë shëndetësia, drejtësia dhe arsimi.