Shkalla e kriminalitetit të shqiptarëve në Britani konsiderohet të jetë e lartë, por njëkohësisht raportet flasin për një numër të lartë të kërkesave të shqiptarëve për vizë pune të cilat janë refuzuar, dhe kanë çuar në inkurajimin e emigrimit të paligjshëm dhe më pas përfshirjes në aktivitet kriminal. Një raport i komitetit të punëve të brendshme, tregon se në nëntë muajt e parë të vitit 2022, Mbretëria e Bashkuar mori më shumë 24 mijë aplikime për vizë nga qytetarët shqiptarë dhe miratoi vetëm 325 viza pune. Pavarësisht se në atë periudhë Britania kishte nevojë për krah pune dhe llogariteshin rreth një milionë e 300 mijë vakanca, pati vështirësi në përfitimin e vizave të punës nga qytetarët shqiptarë. Në raport thuhet se Shqipëria është vend i sigurt, nuk ka luftë apo destabilitet, ndaj emigrimi nxitet nga nevoja për punë dhe të ardhura më të larta.