Ngjarja e fundit ku nga një zjarr në magazinat e një qendre tregtare këtu në Tiranë, humbi jetën një Arjan Sala, nxorri në pah edhe mundësitë që ka shërbimi ynë zjarrfikës, pavarësisht punës të punonjësve të këtij shërbimi. Për ngjarjen në fjalë, pas 24 orë përpjekjesh edhe forcat zjarrfikëse janë dorëzuar dhe kanë kërkuar ndihmën e ushtrisë për ndërhyrjen mes flakëve që kishin përfshirë objektin. Mungesën e pajisjeve dhe veshjeve të duhura të shërbimit tonë zjarrëfikës, për të përballuar situata të vështira, e ka pohuar në Wake Up, kryetari i Sindikatës së Pavarur të Zjarrfikësve, Bledar Barjami. “Rrobat zjarrduruese janë për një zjarr banese, për një zjarr në ambiente të jashtme që e durojnë zjarrin deri në një pikë. E kam ngritur edhe më parë si mungesë. Rrobat që ne kemi është njësoj si ato që ke një mish ta mbështjellësh me letër alumini ta fusësh në furrë. Kamerat termike ne nuk i kemi pasur kurrë. Bombolat tona arrijnë deri në 20 minuta të durojnë dhe oksigjeni vjen shumë i ngrohtë kur ka temperatura të larta. Ne marrim kompresorë dhe kompromojmë ajrin me bombola. Kjo nuk është e shëndetshme dhe nuk është zgjidhje,. Vendos kompresorët, ndërron bombolat” I pyetur nëse do kishin pajisjet e duhura, gjërat do kishin shkuar ndryshe për Arjan Salën, ai u shpreh “Them se po. Shpimi i soletës nga lart me aparatura të posaçme dhe të mbushej magazina nga sipër me shkumë, me ujë, me shkumë do të ishte efikase. Të paktën nuk do kishim përfunduar kështu, tre ditë duke fikur një zjarr. Trupi i njeriut ka një veti që asimilon menjëherë dioksidin e karbonit. Zjarrfikësit kanë punuar 24 orë pa ndërprerje"