Ministria e Punëve të Jashtme dhe Diasporës në Kosovë ka bërë thirrje për kujdes nga të gjithë bashkatdhetarët që planifikojnë të udhëtojnë drejt territorit të Kosovës përmes transportit rrugor, sidomos ata që kanë dokumente udhëtimi të skaduara. Në njoftimin zyrtar, ministria thekson se disa shtete të tranzitit kërkojnë dokumente të vlefshme për kalimin nëpër territorin e tyre, pa përjashtim. Për këtë arsye udhëtimi me pasaporta apo letërnjoftime të skaduara nuk lejohet në këto vende, pavarësisht nëse vendi i nisjes e lejon një gjë të tillë. “Duke iu referuar rasteve të fundit të paraqitura gjatë kalimeve tranzit, veçanërisht nëpër territorin e Italisë, theksojmë nevojën që qytetarët të verifikojnë paraprakisht kërkesat për dokumentacion për secilin vend që kalojnë gjatë udhëtimit të tyre”, thuhet ndër të tjera në njoftim. Ministria apelon që të gjithë qytetarët të planifikojnë udhëtimet e tyre me kujdes dhe të verifikojnë më parë rregullat për kalim kufitar në secilin shtet të tranzitit. Në raste pasigurie, qytetarët këshillohen të kontaktojnë ambasadat ose konsullatat e Kosovës për udhëzime shtesë.