Italia ka regjistruar 24 orët e shkuar një rekord absolut infektimesh nga koronavirusi. Sipas ministrisë së shëndetësisë, në 24 orë janë regjistruar 7332 raste që e cojnë totalin në vend në 372799. Shifra më e lartë deri më sot, që nga fillimi i emergjencës ishte regjistruar më 21 mars, me 6557 raste në një ditë. Por në atë rast, testimet e bëra ishin 26 mijë ndërsa 24 orët e shkuara janë bërë 152196 tamponë, një shifër rekord kjo që nga fillimi i emergjencës. Ndërsa rritet numri i rasteve aktive, në 92445, është rritur po ashtu edhe numri i të shtruarve në spital dhe atyre në terapi intensive. Ndërsa numri i viktimave të koronavirusit, 24 orët e shkuara, është 43. Autoritetet në itali kanë rritur ndjeshëm numrin e testimeve, dhe është vënë re ditët e fundit radhë e gjatë për të bërë tamponin duke filluar madje nga ora 5 e mëngjesit. Nga totali i raportuar të mërkurën 1844 raste janë regjistruar vetëm në Lombardi. Por pavarësisht shifrave, kryeministri italian, Giuseppe Conte, thotë se do të evitohet një izolim i ri në shkallë kombëtare por mbetet e hapur mundësia për marrjen e masave kufizuese në rajone të caktuara, sapo të shfaqet nevoja. Pamjet: AFP