Një valë e fuqishme dhune ka përfshirë Meksikën pas vrasjes së baronit të drogës, i njohur si “El Mencho”. Ai ishte kreu i kartelit Jalisco New Generation Cartel (CJNG) dhe mbeti i vrarë gjatë një operacioni ushtarak në qytetin Tapalpa, ku forcat e sigurisë synonin arrestimin e tij. Sipas Ministrisë meksikane të Mbrojtjes, gjatë përleshjeve u vranë edhe katër anëtarë të kartelit, ndërsa tre ushtarakë mbetën të plagosur. Vdekja e “El Mencho” shkaktoi reagim të menjëhershëm nga anëtarët e tjerë të kartelit, të cilët nisën sulme dhe akte hakmarrjeje në disa zona të vendit. Dhuna u përhap në të paktën 12 shtete, me rrugë të bllokuara nga automjete të djegura dhe persona të armatosur që qarkullonin në qytete të ndryshme. Re tymi u panë mbi disa zona urbane, përfshirë Guadalajara, një nga qytetet pritëse të FIFA World Cup. Në qytetin turistik Puerto Vallarta, situata u përshkrua nga dëshmitarët si “zonë lufte”.