Një nga trafikantët më të kërkuar të drogës në botë, “El Mencho”, u vra gjatë një operacioni të ushtrisë meksikane në shtetin perëndimor të Jaliscos. 59-vjeçari ishte lider i Jalisco New Generation Cartel, një nga organizatat kriminale më të fuqishme dhe më të dhunshme në Meksikë. Edhe pse në arenën ndërkombëtare nuk ishte më famëkeqi, karteli i tij njihej për brutalitetin dhe arsenalin me stil ushtarak. Shtetet e Bashkuara kishin ofruar 15 milionë dollarë shpërblim për kapjen e tij, pasi akuzohej për trafikim të sasive të mëdha kokaine, fentanili dhe metam fetamine drejt territorit amerikan. ‘El Mencho’ konsiderohej një nga figurat e fundit të brezit të vjetër të baronëve të drogës, që e nisën aktivitetin kriminal dekada më parë, në një periudhë kur krimi kishte lidhje të forta me pushtetin politik në Meksikë.