Mijëra persona marshuan të shtunën në Lyon, në juglindje të Francë, në nder të 23-vjeçarit Quentin Deranque, (kontan deronki) i cili humbi jetën pas plagëve të marra gjatë përleshjeve mes grupeve të ekstremit të djathtë dhe mbështetësve të së majtës radikale. Tubimi u zhvillua nën masa të rrepta sigurie, përfshirë praninë e shtuar të policisë dhe përdorimin e dronëve. Pjesëmarrësit, shumë prej tyre të veshur me të zeza, mbanin pankarta me mbishkrime si “Drejtësi për Quentin” dhe mesazhe kundër së majtës ekstreme. Ngjarja që çoi në vdekjen e të riut ndodhi në periferi të një demonstrate kundër një politikani nga partia e majtë (LFI). Përplasjet mes grupeve rivale kanë thelluar tensionet politike në vend, veçanërisht në prag të zgjedhjeve presidenciale të vitit 2027. Presidenti francez Emmanuel Macron u bëri thirrje qytetarëve të ruajnë qetësinë, duke theksuar se “në Republikë, asnjë dhunë nuk është e ligjshme”. Ai njoftoi se qeveria do të diskutojë javën e ardhshme mbi fenomenin e “grupeve të veprimit të dhunshëm” dhe masat për të parandaluar incidente të ngjashme. Në përfundim të protestës policia njoftoi disa arrestime dhe se po heton disa incidente të izoluara, përfshirë përshëndetje naziste dhe fyerje raciste të kapura në video të shpërndara në internet.