Presidenti amerikan Donald Trump ka njoftuar se Shtetet e Bashkuara të Amerikës do të rrisin tarifat globale mbi importet në nivelin deri në 15%. Sipas deklaratës së tij, masa e re synon të forcojë ekonominë amerikane dhe të mbrojë prodhuesit vendas nga konkurrenca e huaj. Rritja e tarifave pritet të prekë mallrat që importohen nga një numër i madh vendesh, duke përfshirë sektorë të ndryshëm si industria e prodhimit, teknologjia dhe mallrat e konsumit. Tarifat doganore prej 15% do të hyjnë në fuqi të martën, më 24 shkurt dhe mund të qëndrojnë në fuqi vetëm për rreth pesë muaj përpara se administrata të kërkojë miratimin e Kongresit. Trump tha se administrata e tij kishte arritur në këtë vendim, pasi e ka konsideruar qesharak vendimin e Gjykatës Supreme të premten që rrëzoi tarifat e tij të mëparshme. Gjatë muajve të ardhshëm, Administrata Trump do të përcaktojë dhe nxjerrë tarifa të reja dhe ligjërisht të lejueshme që do të vazhdojnë procesin tonë shumë të suksesshëm për ta bërë Amerikën përsëri të madhe më të madhe se kurrë”, deklaroi Trump në Truth social. Rritja e tarifave do të thotë se produktet e importuara do të tatohen më shumë në momentin e hyrjes në tregun amerikan. Për pasojë çmimet për konsumatorët amerikanë mund të rriten, kompanitë importuese mund të përballen me kosto më të larta. Ekspertët ekonomikë sakaq paralajmërojnë se një rritje e tillë e tarifave mund të ndikojë në zinxhirët globalë të furnizimit dhe në inflacion. Nga ana tjetër, mbështetësit e kësaj politike argumentojnë se ajo do të stimulojë prodhimin vendas dhe do të krijojë më shumë vende pune brenda SHBA-së.