Goditet një tjetër rast i veprimtarisë kriminale të dhënies së ndihmës për kalim të paligjshëm të pikës kufitare, në këmbim të shpërblimit. Burimet bëjnë me dije se, Shërbimet e Stacionit të Policisë Kufitare Kapshticë, në bashkëpunim me shërbimet e "Frontex" dhe specialistët për Hetimin e Narkotikëve dhe Trafiqeve të Paligjshme në Drejtorinë Vendore Policore Korçë, në vijim të operacionit policor të koduar “Perimetri”, kanë kapur dhe arrestuar në flagrancë një shtetas 34 vjeç, banues në Fier. Shtetasi u kap në flagrancë nga forcat e policisë në aksin rrugor Bilisht-Korçë, në afërsi të fshatit Cangonj, Devoll duke transportuar me një mjet furgon tip “Fiat” 17 emigrantë të paligjshëm. Mësohet se shtetasi u kishte premtuar kalimin të paligjshëm drejt vendeve të Bashkimit Europian në këmbim të shpërblimit. Materialet i kaluan Prokurorisë së Rrethit Gjyqësor Korçë për veprime të mëtejshme.