Organizata Botërore e Shëndetësisë e kritikoi ashpër vendimin e BE-së për kontrolle mbi eksportin e vaksinave të prodhuara brenda bllokut. Sipas OBSH-së, masa të tilla rrezikojnë të sjellin një zgjatje të pandemisë. BE0ja e paraqiti këtë masë ne mesin e konflikteve që kanë shperthyer mes saj dhe prodhuesve të vaksinave lidhur me problemet e furnizimit. Nënkryetarja e OBSH, Mariangela Simao, tha se ky ishte një “trend shumë shqetësues”, ndërsa me herët kreu I organizatës, Tedros Adhanom Ghebreyesus foli për “nacionalizim të vaksinave” dhe "dështim moral katastrofik" që mund të zgjerojë akoma edhe me shume pabarazinë globale. Brukseli e justifikoi lëvizjen e tij duke thënë se “mbrojtja dhe siguria e qytetarëve europianë janë prioritete dhe sfida që nuk I lënë zgjidhje tjetër”. Megjithatë, Komisioni Europian sqaroi se këto masa nuk do të vlejnë për eksportin në vendet e Ballkanit Perëndimor si dhe në vendet e varfra e ato më pak të zhvilluara, të cilat do të sigurojnë vaksinat përmes programit COVAX.