Presidenti i Shteteve të Bashkuara të Amerikës, Donald Trump, paralajmëroi sanksione të reja ndaj Rusisë, pas sulmit ajror ndaj ndërtesës kryesore të qeverisë ukrainase në Kiev, më i madhi që prej nisjes së luftës në shkurt të vitit 2022. Në sulm u përdor rreth 800 dronë dhe 13 raketa, numri më i lartë i përdorur ndonjëherë nga rusët në këto 3 vite luftë, dhe humbën jetën 3 persona, mes tyre një fëmijë 1 vjeç, si dhe u plagosën 18 të tjerë. “Jemi të përgatitur për një raund të ri masash ndaj Rusisë, nëse situata në Ukrainë nuk ndryshon”, u shpreh Trump në deklaratën e tij, pa dhënë më shumë detaje mbi natyrën e sanksioneve të reja. Sulmi i ndaj godinës qeveritare tronditi autoritetet në Ukrainë. Presidenti Volodymyr Zelensky tha se “këto lloj vrasjesh përbëjnë krime të qëllimshme dhe zgjatje të luftës”. “Për herë të parë është dëmtuar ndërtesa qeveritare nga sulmet e armikut, kulmi dhe katet e larta”, ka thënë kryeministrja e Ukrainës, Yulia Svyrydenko, përmes një njoftimi në Telegram. Ajo bëri thirrje për më shumë armë për Ukrainën dhe që bota të përgjigjet ndaj sulmeve ruse. “Ne do t’i rindërtojmë banesat. Por, jetët e njerëzve nuk mund të kthehen. Armiku po terrorizon dhe vret njerëzit tanë çdo ditë”, ka thënë ajo. Me rritjen e numrit të sulmeve në perëndim të Ukrainës, Polonia ka aktivizuar aeroplanët e vet për të garantuar sigurinë, ka bërë të ditur komanda operacionale e ushtrisë polake. Sulmet kanë zbehur shpresat për bisedime të suksesshme për paqe në mes të Rusisë dhe Ukrainës. Presidenti Zelensky ka refuzuar ftesën e presidentit rus, Vladimir Putin, që të udhëtojë në Moskë për të diskutuar për paqe. “Ai mund të vijë në Kiev. Nuk mund të shkoj në Moskë kur shteti im po sulmohet me raketa çdo ditë. Nuk mund të shkoj në kryeqytetin e këtij terroristi”, tha Zelensky gjatë një interviste. Putin e ka nënvlerësuar disa herë rëndësinë e takimit me presidentin ukrainas, dhe më vonë ka sugjeruar se mund ta takojë atë, por vetëm në Moskë.