Top News – Kontratat për vaksinat anticovid/ Manastirliu-kemi siguruar doza për 800 mijë qytetarë

Ministrja e Shëndetësisë Ogerta Manastirliu, tha në Kuvend se janë kontaktuar doza vaksine anticovid për 800 mijë qytetarë, ku edhe për marrëveshjen me Pfizer janë parapaguar 2.9 milion dollarë, krahas parapagimit në instrumentin COVAX. “Marrëveshja me Pfizer ishte përmbyllja e përpjekjes së pandalur për asnjë moment gjatë këtyre kohëve për sigurimin e 500 mijë dozave vaksinash që së bashku me marrëveshjen e Covax, me mundësimin pra të 1 milion e 140 mijë doza vaksinash, ne kemi tashmë të kontraktuara doza vaksinimi për 800 mijë qytetarë, duke filluar me grupet prioritare. Qeveria shqiptare ka marrë masa në kohë për nënshkrimin e kontratave me të parën kompani që dispononte autorizimet e përdorimit të vaksinës. U angazhuam financiarisht në parapagimin e marrëveshjes së Pfizer-it dhe tashmë kemi paguar rreth 2.9 milion dollarë, si dhe kemi parapaguar në instrumentin e Covax-it për të garantuar sigurimin e vaksinave në një kohë të shpejtë” Manastirliu tha ndër të tjera se janë siguruar mjetet e mbrojtjes personale për stafet mjekësore, medikamentet dhe është rritur numri i testimeve me qëllim këputjen e zinxhirit të infeksionit. “Ja kemi dalë t’u sigurojmë stafeve mjekësorë të gjitha mjetet e mbrojtjes personale njësoj si në çdo vend tjetër, ja kemi dalë të shtojmë numrin e testimeve, të hapim qendrat e testimit të shpejtë në komunitet. 51 pika testimi janë sot në të gjithë territorin dhe lehtësojnë kryerjen e testit duke krijuar mundësinë e këputjes së zinxhirit të infeksionit. Me punë e pa fjalë ja kemi dalë të sigurojmë të gjitha medikamentet për trajtimin e simptomave Covid, me punë pa fjalë paket e trajtimit ambulator anticovid mbështet falas qytetarët për format e lehta dhe të moderuar të sëmundjes” Manastirliu duke bërë një përmbledhje të investimeve të kryera gjatë pandemisë tha se u shtua flota e respiratorëve, monitorëve, paisjeve mjekësore dhe 36 autoambulanca të reja ju shtuan flotës anticovid, duke mundësuar trajtim në kohë për çdo rast urgjence.