Grupet kriminale shqiptare janë kthyer në një ndër mafiat më të rrezikshme në botë, duke marrë kontrollin e trafikut të drogës në një pjesë të konsiderueshme të globit. Prokuroritë hasin shumë vështirësi në zbërthimin e tyre, të cilët për të mos rënë pre e përgjimeve përdorin kode, nofka për emrat, por dhe mjete të avancuara teknologjike për komunikimin, e cila ka ardhur gjithmonë duke avancuar. Në fillimet e tyre, grupet kriminale shqiptare kanë përdorur postën elektronike dhe skype-n për dhënien dhe marrien e porosive. Më së shumti përdornin qendrat e internetit për hapjen e tyre për të shmangur numrit unik të kompjuterit. Një tjetër metodë komunikimi ishte dhe ajo përmes aplikacionit BBM, fillimisht vetëm i aparateve telefonikë Blackberry e më pas edhe si aplikacion për platforma të tjerë. Në vitet pasardhëse, të pasuara me zhvillime të vrullshme teknologjike, u krijuan platformat digjitale të komunikimit Sky ECC dhe EncoChat. Përdorimi i tyre u bë nga grupe më të sofistikuara transnacionale të krimit, për të lehtësuar trafikimin e drogës. Pajisjet Sky dhe Encrochat ofronin mesazhe të pagjurmueshme, vetë-shkatërruese, si edhe mundësi të menjëhershme fshirjeje, nëse përdoruesit kishin dyshime. Platformat instaloheshin në pajisje, që mund të bliheshin në internet dhe çmimi varionte nga 600 në 2 mijë euro. Gjithsesi, në vitin 2020 platforma e koduar Encrochat u çmontua nga autoritetet Franceze e Holandeze, ndërsa një vit më pas, autoritetet e Belgjikës, Francës e Holandës, mundën të bllokojnë platformën tjetër të koduar Sky ECC. Por, kriminelët gjithmonë do e gjejnë një mënyrë për të komunikuar dhe jëmi në pritje të platformës së radhës me të cilën ata japin dhe marrin udhëzime dhe mesazhe.