Këshilli i Lartë Gjyqësor vendosi shtyrjen e seancës të dhënies së vendimit për gjyqtaren e Krujës, Enkelejda Hoxha. Nënkryetari i KLGJ, Maks Qoku ka thënë se seanca do të shtyhet me 25 shkurt dhe avokati duhet të depozitojë mbrojtjen me shkrim më 23 shkurt. Kujtojmë se Enkelejda Hoxha, më parë u pezullua nga detyra deri në përfundim të hetimeve dhe marrjen e një vendimi të formës së prerë. Avokati i saj, në seancën e kësaj të marte, kërkoi pezullim të procesit pasi sipas tij, magjistratja duhet të jetë në séance dhe duhet kohë për mbledhjen e provave, e po ashtu për një për një propozim drejtuar Inspektoriatit të Lartë të Drejtësisë, për marrëveshje. Kjo u kundërshtuar nga kreu I ILD, Artur Metani, me argumentin se elementët e procesit të rregullt ligjor përmbushen me prezencën e avokatit. Gjyqtarja Hoxha njihet si ‘avokatja mbrojtëse’ që ka mundësuar lirimin e parakohshëm të disa kriminelëve të dënuar me burgim të përjetshëm. Gjykata e Posaçme e Shkallës së Parë Për Korrupsionin dhe Krimin e Organizuar ka caktuar më herët masën e sigurisë arrest në burg për shtetasen Enkelejda Hoxha, gjyqtare në Gjykatën e Rrethit Gjyqësor Krujë, e dyshuar për veprën penale penale “Korrupsioni pasiv i gjyqtarëve, prokurorëve dhe funksionarëve të tjerë të drejtësisë”, kryer në bashkëpunim.