Ushtria e Kinës zhvilloi stërvitje në të cilat hapi edhe zjarr, të mërkurën, në brigjet jugperëndimore të Tajvanit, një veprim që Taipei e përshkroi si provokues dhe të rrezikshëm, ndërsa një udhëheqës i lartë kinez u zotua për përpjekje të palëkundura për ta vënë ishullin nën kontrollin e Pekinit. Tajvani i qeverisur në mënyrë demokratike, të cilin Kina e sheh si territorin e saj, është ankuar vazhdimisht për aktivitetet ushtarake kineze, duke përfshirë disa raunde lojërash luftarake në shkallë të plotë gjatë tre viteve të fundit. Pak para orës 9 të mëngjesit, Ministria e Mbrojtjes e Tajvanit tha në një deklaratë, se kishte pikasur 32 avionë ushtarakë kinezë që kryenin një "stërvitje të përbashkët gatishmërie luftarake" me anije luftarake kineze në zonën e ngushticës së Tajvanit. "Gjatë kësaj periudhe ushtria kineze madje ka shkelur hapur praktikën ndërkombëtare duke krijuar një zonë stërvitjeje në ujërat rreth 40 milje detare larg bregut, pa paralajmërim paraprak", shtoi ministria. Stërvitjet rrezikojnë sigurinë e fluturimeve ndërkombëtare dhe transportit detar dhe janë një "provokim i hapur" për paqen dhe stabilitetin rajonal, tha ministria, duke shtuar se kishte dërguar forcat e veta për të vëzhguar. Kina kurrë nuk ka hequr dorë nga mundësia e përdorimit të forcës për të sjellë Tajvanin nën sundimin e saj dhe e ka quajtur presidentin Lai Ching-te, i cili mori detyrën vitin e kaluar, një "separatist" ndërsa ka denoncuar Shtetet e Bashkuara të amerikës për mbështetjen e tyre për Tajvanin.