Lideri i Koresë së Veriut Kim Jong Un ndoqi një stërvitje që përfshiu edhe zjarr me artilerinë e rëndë nga Ushtria Popullore Koreane, forca ushtarake e vendit, raportoi të premten media shtetërore KCNA. Stërvitja, e kryer të enjten, përfshiu njësi pranë kufirit që janë në rrezen e qitjes së "kryeqytetit të armikut", tha KCNA, duke iu referuar kryeqytetit të Koresë së Jugut me gati 10 milionë banorë dhe shtoi se "stërvitja përmbushi misione të rëndësishme ushtarake për parandalimin e luftës". Shefi i Shtabit të Përbashkët të Koresë së Jugut tha se ushtria e Koresë së Veriut testoi raketahedhëse të reja dhe predha artilerie drejt Detit të Verdhë të enjten. Ushtria e Seulit tha se po monitoronte aktivitetet ushtarake të Veriut ndërkohë që stërvitjet e përbashkëta të kryera nga ushtritë e Koresë së Jugut dhe asaj amerikane, po vazhdojnë. Stërvitjet, të njohura si ‘Mburoja e Lirisë’, filluan të hënën me dy herë më shumë trupa në krahasim me vitin e kaluar. Koreja e Veriut ka bërë gjithashtu "përpjekje të shumta" për të bllokuar sinjalet GPS pranë kufirit në Korenë e Jugut që nga e marta, tha ushtria koreanojugore në një deklaratë të veçantë, duke shtuar se nuk pati dëme por paralajmëroi për pasoja.