Koreja e Veriut tha se ka testuar një raketë anti-ajër “të zhvilluar rishtazi”. Sipas agjencisë verikoreane të lajmeve KCNA, testimi u krye të enjten. Raketa ka një “performancë të jashtëzakonshme luftarake” dhe përfshin teknologji të reja, tha KCNA. Ditë më parë, Koreja e Veriut tha se ka testuar edhe një raketë të re hipersonike, e cila besohet se ka aftësi bërthamore. Muajin e kaluar, ajo ka testuar edhe raketa lundrimi me rreze të gjatë veprimi dhe raketa balistike. Sekretari amerikan i Shtetit, Anthony Blinken, tha se testet e tilla “krijojnë shanse më të mëdha për paqëndrueshmëri dhe pasiguri”. Phenjani thotë se armët e tij janë të nevojshme për vetëmbrojtje dhe e akuzon SHBA-në dhe Korenë e Jugut për “standarde të dyfishta”. Shteti komunist, tash e sa vite, është nën sanksione ndërkombëtare për armët e tij bërthamore dhe programet e raketave balistike.