Ndërkohë që Presidenti Donald Trump po shqyrton mundësinë e ndërhyrjes ushtarake në Venezuelë, Shtetet e Bashkuara po shtojnë praninë e tyre në Karaibe me anije luftarake dhe bombardues B-52 afër brigjeve të Venezuelës. Si përgjigje, presidenti venezuelas Nicolas Maduro ka ripozicionuar forcat e armatosura, ka mobilizuar miliona milicë dhe ka akuzuar SHBA-në për agresion. Zyrtarë të administratës Trump kanë pranuar se qëllimi kryesor i kësaj fushate presioni është largimi i Maduros nga pushteti. Me rritjen e tensioneve këtë vjeshtë, Maduro ka forcuar retorikën nacionaliste dhe ka urdhëruar ushtrime të reja ushtarake nga Forcat e Armatosura Bolivariane, të cilat përbëhen nga rreth 123 mijë trupa. Ai gjithashtu pretendon se ka mobilizuar mbi 8 milionë milicë vullnetarë, megjithëse ekspertët e sigurisë vënë në dyshim saktësinë dhe efektivitetin e këtij numri. Në javët e fundit, ushtria amerikane ka goditur anije të dyshuara për trafik droge në afërsi të Venezuelës, duke dërguar një sinjal të qartë për regjimin e Maduro-s. Presidenti Trump ka deklaruar se ka autorizuar CIA-n të kryejë operacione të fshehta në Venezuelë për të frenuar trafikun e drogës dhe emigracionin ilegal, edhe pse nuk ka konfirmuar një ndërhyrje direkte për rrëzimin e Maduro-s.