Pak muaj pas vrasjes tragjike të studentes shqiptare, Ilaria Sula, në Itali, një tjetër ngjarje e rëndë raportohet nga vendi fqinj. Studenti 23-vjeçar me origjinë shqiptare, Hekuran Cumani, u vra me thikë këtë të shtunë në parkingun e departamentit të Matematikës dhe Informatikës të Universitetit të Perugias. Ai i goditur me thikë në gjoks pas një sherri mes një grupi personash, duke ndërruar jetë në vendngjarje. Policia italiane po punon për të rindërtuar ngjarjen dhe për të përcaktuar shkaqet e vrasjes. Hetuesit dyshojnë se studenti shqiptar ishte përfshirë në një sherr me autorin në një lokal pranë universitetit, ku pas fyerjeve, ai është goditur për vdekje me thikë. Autoritetet italiane dyshojnë se në vrasje janë përfshirë disa persona. Siç raportojnë mediat italiane, 23-vjeçari kishte udhëtuar drejt Peruxhias për një mbrëmje me shokët, ku dyshohet se grupi i tij ishte përfshirë në konfliktin me një grup tjetër. Hetuesit kanë marrë në pyetje të gjithë personat që ishin prezentë gjatë incidentit, ndërsa po shihen kamerat e sigurisë përreth zonës për të identifikuar autorin e vrasjes. Ngjarja e rëndë shkaktoi tronditje edhe tek autoritetet lokale. Në një deklaratë të përbashkët, kryetari i bashkisë së Peruxhias, këshilli bashkiak dhe Këshilli Komunal kanë shprehur dhimbjen e tyre për humbjen e jetës së të riut.