Ukraina dhe Rusia kanë këmbyer rreth 100 të burgosur, 50 nga secila palë. Kreu i zyrës presidenciale ukrainase, Andriy Yermak, konfirmoi se mes 50 të burgosurve të kthyer ukrainas janë edhe të mbijetuarit nga rrethimi i fabrikës së hekurit dhe çelikut, Azovstal. Ministria ruse e Mbrojtjes dhe kreu i separatistëve të mbështetur nga Rusia në rajonin e Donjeckut, Denis Pushilin, konfirmuan se forcat ukrainase i kishin dorëzuar palës ruse 50 të burgosur. Kjo ndodh një ditë pas një tjetër këmbimi të burgosurish mes Kievit dhe Moskës, ku 36 persona - 35 ushtarë dhe një civil - u kthyen në Ukrainë, dhe 35 ushtarë rusë u riatdhesuan. Zyra e OKB-së për të Drejtat e Njeriut tha më herët këtë muaj se Rusia dhe Ukraina kanë torturuar të burgosur të luftës gjatë konfliktit gati nëntëmujor mes tyre.