Një shqiptar nga Kosova, i shpallur në kërkim nga autoritetet shqiptare është vënë në pranga nga policia gjermane. Ky shtetas ishte shpallur në kërkim ndërkombëtar nga Interpol Tirana, pasi Gjykata e Durrësit, me vendimin në vitin 2022, i ka caktuar masën e sigurisë "Arrest në burg". Shqiptari nga Kosva akuzohet për veprat penale "Kanosja”, “Shtrëngimi me anë të kanosjes ose dhunës për dhënien e pasurisë” dhe “Ngacmimi seksual". Sipas informcioneve të policisë, 62-vjeçari dyshohet se ka kërcënuar një shtetase, për dhënien e 5000 eurove, që të mos publikonte video intime të saj. Gjithashtu, dyshohet se ka ngacmuar seksualisht mbesën e kësaj shtetaseje. Kapja e këtij shtetasi ishte rezultat i informacionit të siguruar nga Policia shqiptare dhe i shkëmbimit të tij me homologët gjermanë. Interpol Tirana dhe Interpol Wiesbaden po kryejnë procedurat për ekstradimin e këtij shtetasi, në shtetin shqiptar.