Në muajin tetor të vitit të kaluar Europol publikoi një raport të detajuar, në të cilin kishte vend edhe për Shqipërinë lidhur me krimin kibernetik dhe evoluimin e tij gjatë kohës së pandemisë. I titulluar “kërcënimi nga krimi i organizuar në internet”, në raport u përmenden asokohe disa nga ndryshimet që grupet kriminale po përdorin në këtë fushë. Sipas raportit përgjatë muajve të pandemisë faqet online, të cilat transmetojnë në kohë reale abuzime seksuale me të mitur janë dyfishuar duke bërë që autoritetet ligjzbatuese ta kenë thuajse të pamundur për t’i identifikuar. Në raport në atë kohë thuhej se shumë shpejt grupet kriminale do arrinin të hakerojnë dhe zërin biometrik për të siguruar të dhëna deri te kartat e kreditit, apo dhe krime të tjera që kanë të bëjnë me lundrimin në internet.