Faktin që komisionerja e BE për inovacionin, kulturën dhe edukimin Mariya Gabriel, iu bashkua online një bashkëbisedimi të kreut të PD Lulzim Basha me tematikë arsimin, të transmetuar drejtpërdrejtë nga selia e PD-së, kryeministri Edi Rama e pa si një përfshirje në fushatë, dhe reagoi duke mos i kursyer kritikat ndaj tyre. Shefi i ekzekutivit kërkoi reagimin e Brukselit ndaj këtij episodi, të cilin e përshkroi si “futje hundësh në fushatë elektorale, gjë të cilën sic tha ai, Komisioni Europian nuk e ka zakon ta bëjë. KE-ja reagoi për një media shqiptare përmes zëdhënëses Ana Pisonero, duke i meshuar idese se aktiviteti në fjalë është mbajtur në nivel rajonal dhe nuk ka asnjë ndikim në situatën politike shqiptare. “Komisioni nuk komenton mbi komentet e palëve të treta. Lutemi të keni parasysh që Komisionerja Mariya Gabriel mori pjesë në Tryezën e 18-të Rrumbullakët mbi Arsimimin, me ftesë të Universitetit Modul të Vjenës, i cili është organizatori i këtij eventi. Pjesëmarrja e komisioneres ishte e kufizuar vetëm në dhënien e një fjalimi kryesor”, është shprehur ajo. Pisonero shtoi se “fjalimi, i cili është i publikuar në faqen e internetit të Komisionit, është i fokusuar mbi iniciativat e fundit europiane në fushën e arsimimit dhe të kërkimit, të cilat vlejnë për të gjithë rajonin e Ballkanit Perëndimor, përfshirë Shqipërinë. Komisionerja nuk bëri ndonjë deklaratë për ndonjë parti politike, por mbajti një fjalim mbi çështjet që kishin të bënin me fushën e saj”, theksoi zedhenesja.