Kërkimi për katër ushtarë amerikanë që u zhdukën gjatë një misioni stërvitor pranë kufirit të Lituanisë me Bjellorusinë është duke vazhduar, tha ushtria amerikane të mërkurën, pasi automjeti i tyre i blinduar u gjet i zhytur në ujë. Ushtarët u raportuan të zhdukur në një zonë stërvitore pranë qytetit të Pabrade rreth orës 16:45 minuta të së martës, thanë Forcat e Armatosura Lituaneze në një deklaratë për shtyp. Më vonë të mërkurën, Ushtria Amerikane për Evropën dhe Afrikën konfirmoi se automjeti i blinduar M88 i drejtuar nga ushtarët u gjet në një zonë stërvitore. “Automjeti u zbulua i zhytur në ujë në një zonë stërvitore pas një kërkimi nga Ushtria Amerikane, Forcat e Armatosura Lituaneze dhe autoritetet e tjera lituaneze”, thuhet në deklaratë. "Përpjekjet për rikuperim janë duke vazhduar nga Ushtria e SHBA-së dhe Forcat e Armatosura të Lituanisë dhe agjencitë civile. Përpjekjet e kërkimit për ushtarët vazhdojnë po ashtu".