Beteja mes palëve politike për zgjedhjet e 11 majit vijon në Komisionin e Ankimimeve dhe Sanksioneve. Ky I fundit rrëzoi paraprakisht kërkesën e koalicionit ‘Nisma Shqipëria Bëhet’ për hapjen dhe rinumërimin e të gjitha kutive të qarkut Vlorë, por hapi vetëm një prej tyre, për të verifikuar nëse pretendimet e këtij koalicioni, se fletët e votimit kanë qenë pa vulat përkatëse, qëndron apo jo. Nga hapja e kutisë nr. 4494/00, KZAZ 85 rezultoi se të gjitha fletët e votimit kishin vulat përkatëse. Por krahas kërkesës së Nisma Shqipëria Bëhet, me ta u bashkua edhe përfaqësuesi I PArtisë Demokratike, I cili kërkoi hapje të paktën të të gjitha kutive të materialeve zgjedhore, për shkak të mungesës një numri të madh të fletëve të votimit, apo raportimeve të shumë qendrave të votimit se kanë patur 0 fletë votimi të papërdorura. Ndërkohë KAS dhe subjektet po presin dorëzimin e një raporti përfundimtar nga KQZ pas kryqëzimit të të dhënave nga PEI, për të marrë një vendim përfundimtar për këtë kërkesë për kutitë e Qarkut Vlorë.