Policia e Lezhës ka arrestuar një 30 vjeçar në Kurbin pasi akuzohet se ka kryer disa vjedhje në vende të ndryshme të BE-së. Operacioni është kryer në bashkëpunim me interpol tiranën, me mbështetjen e Departamentit të Policisë Kriminale dhe nën drejtimin e Prokurorisë së Rrethit Gjyqësor Kurbin, pas një hetimi disamujor. Sipas një njoftimi të policisë, janë sekuestruar 2 krehra me fishekë, municion luftarak, ora të markave të ndryshme dhe sende të tjera me vlerë që dyshohet se rrjedhin nga aktiviteti kriminal. Operacioni që coi në arrestimin e 30 vjecarit, ishte koduar me emrin aksesorët. Policia thotë se ka patur më herët informacione për një shtetas që dyshohej për veprimtari të jashtligjshme në fushën e vjedhjes së banesave në vendet e BE-së, dhe pas një hetimi disa mujor, u arrit në arrestimin e shtetasit me inicialet B.N., banues në Kurbin, i arrestuar edhe më parë jashtë shtetit. Vec sendeve të përmendura më lart, policia konfiskoi në banesën e tij edhe unaza, byzylykë dore, varëse etj, për të cilat nuk ksihte asnjë dokumentacion apo faturë blerjeje dhe që dyshohet se janë produkte të veprimtarisë kriminale të tij jashtë vendit.