Rusia pretendon se mbrojtja e saj ajrore e shkatërroi një dron që po i afrohej Moskës dhe dy të tjerë në një rajon në kufi me Ukrainën gjatë natës së 27 gushtit. Mbrojtja ajrore në rajonin Liubertsi në juglindje të kryeqytetit “rrëzoi një dron që po fluturonte drejt Moskës”, tha kryebashkiaku i qytetit, Sergei Sobyanin, në Telegram, pa treguar se kush e kreu sulmin. “Nuk ka viktima apo dëme, sipas raportimeve fillestare. Shërbimet e emergjenvace janë në vendin e ngjarjes”, shkroi ai. Po ashtu, edhe Ministria e Mbrojtjes së Rusisë tha se mbrojtja ajrore e saj shkatërroi një dron në rajonin Liubertsi rreth orës 4:30 të mëngjesit të së hënës dhe fajësoi Kievin për sulmin. Trafiku ajror në aeroportet e Moskës, Domodedovo dhe Vnukovo, u pezullua, sipas agjencisë shtetërore të lajmeve të Rusisë, TASS, e cila e citoi shërbimin e aviacionit. Dy dronë të tjerë u shkatërruan nga mbrojtja ajrore në rajonin Briansk në kufi me Ukrainën, tha Ministria e Mbrojtjes pa sqaruar nëse ka patur apo jo viktima apo dëme. Kryeqyteti dhe rajonet tjera ruse kanë qenë shënjestër e sulmeve të njëpasnjëshme nga dronët ukrainas në javët e fundit, që pasi Kievi nisi kundërofensicën e tij këtë verë.