Për shkak të mosveprimit në kohë të Drejtorit të Përgjithshëm të Autoritetit Kombëtar të Ushqimit, shqiptarët konsumuan rreth 12 tonë akullore dhe çokollata me përmbajtje kancerogjene Gazeta Shqip mëson se kallëzimi penal në Prokurorinë e Tiranë i bërë nga Kontrolli i Lartë i Shtetit ndaj drejtorit të AKU-së, Bledar Skënderi bazohet te vonesa disaditore në reagimin e këtij institucioni për të ndërhyrë në treg me bllokimin e akulloreve dhe çokollatave kancerogjene. KLSh bazon kallëzimin te fakti që Autoriteti Kombëtar i Ushqimit është sinjalizuar që në fund të muajit korrik nga RASFF (Rapid Alert System for Food and Feed) i Bashkimit Europian. Megjithatë, AKU në Shqipëri ka reaguar vakët vetëm pas një jave duke bllokuar akulloret dhe çokollatat që gjeti në magazinat e mëdha të importuesve kryesorë të këtyre produkteve.