Një ish ministër i qeverisë kroate është arrestuar nën dyshimin se ka keqpërdorur fondet e bashkimit evropian. Zyra e prokurtorit publik evropian njoftoi se në total katër persona akuzohen për mashtrim. Të dyshuarit përballen me akuza në lidhje me procedurat publike për blerjen e sistemeve IT dhe janë arrestuar nga policia. Keqpërdorimet e aluduara janë kryer në ministrinë kroate për zhvillimin rajonal dhe fondet e BE-së. Kryeministri i kroacisë, Andrei Plenkovic konfirmoi më pas se ish ministrja e qeverisë, Gabrijela Zalac është një nga të dyshuarat. Zalac, anëtare e partisë në pushtet, HDZ, ka shërbyer nën Plenkovic si ministre e zhvillimit nga 2016-2019, para një ristrukturimi të qeverisë. Po ashtu në pranga kanë përfunduar edhe zyrtarë të tjerë të lartë. Prokuroria evropiane tha në një deklaratë se kishte kryer aktivitete për të mbledhur prova në bashkëpunim me policinë anti korrupsion të kroacisë. Organi me bazë në Luksemburg e nisi punën në qershor për të luftuar keqpërdorimin e buxhetit të BE-së. Kryeministri Plenkovic tha se ishte i habitur me arrestimin e Zalac por nënvizoi se instituciuonet e drejtësisë janë të pavarura dhe bëjnë punën e tyre. Lufta kundër korrupsionit ka qenë një nga kushtet për anëtarësimin e Kroacisë në bllok në 2013-ën.