Bordi i guvernatorëve të mbikëqyrësit bërthamor të OKB-së deklaroi të enjten se Irani ka shkelur detyrimet e tij dhe Teherani njoftoi kundërmasa, ndërsa tensionet u rritën në Lindjen e Mesme. Bordi i Guvernatorëve të Agjencisë Ndërkombëtare të Energjisë Atomike, i cili merret me hartimin e politikave, deklaroi se Irani ka shkelur detyrimet e tij për herë të parë në pothuajse 20 vjet, duke rritur mundësinë e raportimit të kësaj shkeljeje në Këshillin e Sigurimit të OKB-së. Ky hap është kulmi i disa ngërçeve mes Agjencisë me seli në Vjenë dhe Iranit që kur Trump tërhoqi SHBA-në nga një marrëveshje bërthamore midis Teheranit dhe fuqive të mëdha në vitin 2018 gjatë mandatit të tij të parë. Një zyrtar i Agjencisë tha se Irani ishte përgjigjur duke informuar mbikëqyrësin bërthamor se planifikon të hapë një strukturë të re për pasurimin e uraniumit. Lëvizja e Iranit është mes disa masave që po merren për shkak të rezolutës, tha televizioni shtetëror iranian. Zyrtari i Agjencisë së OKB-së, i cili foli në kushte anonimiteti, tha se Irani nuk kishte dhënë detaje të mëtejshme, si psh vendndodhja. Pasurimi mund të përdoret për të prodhuar uranium për karburant reaktori ose, në nivele më të larta të rafinimit, për bomba atomike. Irani thotë se programi i tij i energjisë bërthamore është vetëm për qëllime paqësore.