Remdesivir ka marrë dritën jeshile të BE-së, duke u kthyer në ilacin e parë të miratuar në nivelin e Bashkimit Evropian për trajtimin e koronavirusit. Miratimi që u realizua me procedurë të përshpejtuar, erdhi pas rekomandimit të Agjencisë Europiane të Barnave (EMA), si dhe OK-it të vendeve anëtare të bllokut. "Mbrojtja e shëndetit publik është një përparësi kryesore e bllokut, prandaj të dhënat për Remdesivirin janë vlerësuar në një kohë jashtëzakonisht të shkurtër", thuhet në deklaratë. Komisionerja Europiane për Shëndetin dhe Sigurinë e Ushqimit, Stella Kyriakides,e cilësoi aprovimin një hap të rëndësishëm në luftën kundër koronavirusit. "Kjo tregon qartë vendosmërinë e BE-së për të reaguar shpejt", tha Kyriakides. Remdesivir i përket një klase të ilaçeve të njohura si “zëvëndësim i nukleozidit” të cilat përdoren gjerësisht në trajtimin e kancereve, viruseve dhe infeksioneve të ndryshme. Ende janë duke u bërë prova për efikasitetin e tij në trajtimin e pacientëve me COVID-19, por ka shenja shpresëdhënëse se ilaçi është i dobishëm në trajtimin e sëmundjes, veçanërisht te pacientët në gjendje kritike. Në 1 maj, Administrata e Ushqimit dhe e Barnave e SHBA-së lëshoi me urgjencë lejen për përdorimin e ilaçit intravenoz tek pacientët e shtruar në spital.