Presidenti i zgjedhur Bajram Begaj, merr detyrën këtë të dielë, në një ceremoni zyrtare, që do të nisë në Kuvendin e Shqipërisë dhe përfundojë në Presidencë. Në orën 18:00, Kuvendi i Shqipërisë do të mblidhet në seancën e posaçme plenare, e cila do të jetë edhe e fundit për këtë sezon legjislativ, ku do të betohet Presidenti Begaj. Pas betimit në Kuvend, Presidenti Bajram Begaj, do t’i drejtohet Presidencë, ku edhe do të zhvillohet ceremonia shtetërore për marrjen e detyrës dhe njëherësh mbarimi i mandatit të Ilir Metës, pas 5 vitesh lufte të ftohtë me qeverinë socialiste, që e votoi për të qenë në krye të shtetit. Në axhendën e publikuar nga Këshilltari për Mediet i Presidentit të Republikës, Tedi Blushi, ceremonia nis në orën 19:15, ku pas të ftuarve mbërrin në Presidencë, kreu i ri i shtetit, Bajram Begaj. Në orën 19:29 minuta Begaj e Meta do të ngjiten në tribunë, teksa do të luhet himni kombëtar. Pas himnit, do të jetë kryetarja e Gjykatës Kushtetuese, Vitore Tusha, e cila do t’i dorëzoj Presidentit Begaj Kushtetutën, dhe fill pas kësaj, ky i fundit do të mbajë edhe fjalën e parë nga Presidenca, e cila do të ndiqet nga lënia e selisë nga Ilir Meta. Pas përfundimit të ceremonisë shtetërore, familja presidenciale Begaj, do të presë të ftuarit në një pritje zyrtare në oborrin e institucionit.