“Nuk desha ta vrisja”, kështu deklaroi Denis Meçe, autori I vrasjes së 42-vjeçarit Egli Proga para hetuesve. 29-vjeçari pak pasi u vetëdorëzua në ambientet e komisariatit të policisë së Pogradecit pretendoi se nuk e njihte viktimën dhe se ishte ky I fundit që e kishte ofenduar dhe se ndodhej në gjendje të dehur. “Gjatë kohës që ishim ulur ne lokal, vjen ky djali, emrin nuk ja dija. Ai na ka përshëndetur dhe ka hyrë në lokal, në një moment mua më kanë mbaruar cigaret dhe kam hyrë brenda i kam thënë pronarit të lokalit për cigare, por atje ky djali më ka thënë: ja se ta dredh një unë dhe unë për respekt ja mora. Sa kam kthyer kurrizin ky më shau.” Thuhet në dosjen e prokurorisë të siguruar nga Top Channel. Autori thotë me tej se e ka nxjerrë viktimën jashtë por ai u rrëzua dhe më pas nuk u ngrit më. “Unë i kam thënë po hajde pak jashtë të flasim, ai më shau sërish dhe kemi dalë jashtë. Unë kam dashur t’i fus një shpullë ta qetësoja por, sa i jam afruar kam ngritur dorën ai është rrëzuar në tokë dhe nuk u ngrit më. Mua nuk më është besuar hiç dhe pasi jam frikësuar nga situata jam larguar. Dua të them se unë kisha gjithë ditën që konsumoja alkool dhe me sa pashë edhe ai ishte i dehur”, rrëfen ai.