Me kërkesë të Prokurorisë së Tiranës, janë sekuestruar 9.000 metra katror tokë arë në zonën e Fushë Prezës, në kuadër të hetimeve për një rast të dyshuar mashtrimi dhe pastrimi parash. Sipas hetimeve, të nisura pas kallëzimit të shtetasit me iniciale M.D., zbuluan se prona në fjalë – e trashëguar nga gjyshi i tij përmes ligjit nr. 7501 – ishte përvetësuar në mënyrë të paligjshme nga Altin Topalli i cili më pas e kishte shitur për përfitime personale. Sipas Prokurorisë, prona nuk figuronte më si pasuri e familjes, por kishte kaluar në emër të Altin Topallit, pa miratimin e anëtarëve të tjerë të familjes bujqësore, të cilët figurojnë si bashkëpronarë që prej vitit 1992. Nga dokumentacionet e administruara, rezulton se shtetasi Altin Topalli e zotëronte këtë pasuri. I pyetur për blerjen, Altin Topalli ka dhënë deklarata kontradiktore, duke dhënë dy versione për pasurinë. Një herë se prona ka qenë e babait të tij dhe ai disponon dokumentacion të vjetër dhe më pas ka deklaruar se e ka blerë. Sipas Prokurorisë, nuk ka të dhëna për burimin e ligjshëm të shumës së pretenduar për blerjen – afro 450.000 euro të tokës. Në vitin 2016, kjo pasuri i është “dhuruar” një shtetase me iniciale B.V., e përfaqësuar nga shtetasi A.V., i cili më vonë ka deklaruar se e kishte blerë pasurinë për 100.000 euro. Nga tërësia e provave të mbledhura, rezulton se Altin Topalli e ka përvetësuar në mënyrë të paligjshme pronën përmes mashtrimit ndaj shtetasit H.D.