Qeveria e Hong Kongut i shtyu zgjedhjet parlamentare të shtatorit për një vit, duke thënë se një gjë e tillë është e nevojshme për shkak të situatës së krijuar me koronavirus. Hong Kongu aktualisht po përjeton rritje të numrit të rasteve me koronavirus, ndërsa të premten raportoi 121 raste të reja. Megjithatë, opozita e akuzoi qeverinë për shfrytëzimin e pandemisë si pretekst, për t’i ndaluar njerëzit që të votojnë. Të enjten, qeveria i ndaloi 12 kandidatë pro demokracisë që të garojnë në zgjedhje. Aktivistët e opozitës kanë shpresuar të fitojnë shumicën në Këshillin Legjislativ, në zgjedhjet e shtatorit.