Auren Dhono me profesion inxhinier u vendos në pranga këtë të shtunë, pasi policia e Vlorës, e Himarës dhe IKMT gjetën shkelje mjedisore dhe administrative në një objekt hotelerie me leje të miratuar në fshatin e Dhërmiut. Agjencia e Zhvillimit të Territorit dhe Inspektoratin Kombëtar të Mbrojtjes së Territorit bllokuan objektin në ndërtim dhe vilat përreth tij, pasi u konstatua se mbjetet inertë të ndërtimit, po depozitoheshin në vijën bregdetare duke sjellë ndotje. Jo vetëm kaq, por në këtë kompelks vilash ishin akomoduar për strehim disa persona, në një fazë kur ende nuk ishin përfunduar punimet dhe procedurat ligjore për vënien në funksion të tyre. Sipas policisë dhe organit akuzues inxhinieri dyshohet se ka kryer veprën penale “Menaxhimi i mbetjeve”. Kodi penal parashikon që kjo vepër, kur shkakton ose ka mundësi të shkaktojë dëmtim të rëndë në shëndetin e njerëzve, dënohet me burgim nga dy deri në dhjetë vjet. Ku nga vepra ka ardhur ose ka mundësi të vijë si pasojë vdekja e personit, dënohet me burgim nga pesë deri në pesëmbëdhjetë vjet, ndërsa kur kryhet nga pakujdesia, dënohet me gjobë ose me burgim deri në dy vjet. IKMT mbajti edhe një procesverbal për konstatimin e kundërvajtjes administrative dhe u bllokoi objektin, deri në marrjen e masave për eliminimin e të gjitha shkeljeve ligjore të konstatuara. Materialet që u mblodhën nga ana e policisë, iu referuan prokurorisë së Vlorës e cila pritet të nisë hetimet mbi këtë rast, teksa inxhinieri brenda afatit ligjor do të dalë përpara gjykatës për vlerësim të kushteve të masës së sigurisë.