Imazhet nga stërvitjet ushtarake të Tajvanit, treguan disa sisteme mbrojtëse të sapoblera nga SHBA, gjatë fundjavës, në ditën e shtatë të manovrave të përvitshme të ishullit që vetëqeveriset. Sistemet u shfaqën në zonën metropolitane të dendur të Taipeit si pjesë e stërvitjeve që synojnë mbrojtjen e kryeqytetit kundër një pushtimi të mundshëm nga Kina. Stërvitja Han Kuang po zhvillohet në një sfond tensionesh të larta me Kinën, e cila e pretendon Tajvanin si të vetin dhe është zotuar të marrë nën kontroll, qoftë edhe me forcë. Shtetet e Bashkuara janë furnizuesi kryesor me armë të ishullit, megjithëse Uashingtoni ka mbajtur një politikë të "paqartësisë strategjike" nëse do të ndërhynte apo jo në mbrojtje të ishullit. Të tre sistemet amerikane të armëve u panë në hapësira publike, duke tërhequr vëmendjen e kalimtarëve. Sistemet e raketave Patriot u vendosën nga forcat ajrore të Tajvanit në një park pranë Aeroportit kryesor, si pjesë e një stërvitjeje të fokusuar në mbrojtjen e infrastrukturës kritike nga sulmet ajrore nga Ushtria Çlirimtare Popullore e Kinës. Lëshuesit e raketave mund të ngarkohen me katër raketa Patriot II ose gjashtëmbëdhjetë raketa Patriot III. Patriot II është specializuar për kapjen e avionëve armik dhe raketave lundruese, ndërsa Patriot III është projektuar për mbrojtje kundër raketave balistike. Trupat tajvaneze u panë gjithashtu në të gjithë qytetin duke mbajtur lëshues raketash Stinger mbi supe, si edhe variante të montuara në automjete. Ndërsa më herët, kamionë të blinduar të pajisur me sistemet HIMARS, u panë në qytetin qendror Taichung.