Një delegacion iranian pritet të udhëtojë sot drejt Pakistanit për të nisur negociatat me Shtetet e Bashkuara me synim dhënien fund të luftës. Lajmi është konfirmuar nga ambasadori i Iranit në Pakistan, Reza Amiri Moghadam. Sipas tij, delegacioni do të zhvillojë një takim me zëvendëspresidentin amerikan JD Vance në Islamabad, i cili pritet të zhvillohet të shtunën, si një përpjekje për të çuar përpara dialogun diplomatik mes palëve. Ambasadori iranian bëri të ditur gjithashtu se bisedimet do të bazohen në një paketë me “10 pika” të propozuara nga Irani, megjithatë mbetet ende e paqartë se cilat janë konkretisht këto kushte. Ai theksoi se negociatat do të zhvillohen pavarësisht skepticizmit të opinionit publik në Iran, duke akuzuar Izraelin për shkelje të përsëritura të armëpushimit, të cilat sipas tij synojnë të sabotojnë iniciativën diplomatike.