Demokratët e Senatit do të kërkojnë një votim javën e ardhshme në një përpjekje për të frenuar fuqitë e Presidentit Donald Trump në luftën kundër Iranit, njoftoi udhëheqësi i pakicës në Senat, Chuck Schumer. Demokratët e kanë kërkuar një votim të tillë tre herë këtë vit, por pa sukses. “Kongresi duhet të rivendosë autoritetin e tij, veçanërisht në këtë moment të rrezikshëm. Asnjë president, demokrat apo republikan, nuk duhet ta çojë këtë vend në luftë i vetëm, as tani, as kurrë”, tha Schumer të mërkurën jashtë zyrës së tij në Neë York City. Schumer tha se kërkoi komunikim me Trump gjatë orëve të tensionit lidhur me deklaratën e tij se një qytetërim i tërë do të vdesë, por komunikmi me të ishte i pamundur pasi sipas tij, Shtëpia e Bardhë i tha se presidenti ishte i padisponueshëm. Udhëheqësi demokrat e kritikoi armëpushimin e minutës së fundit si "të brishtë" dhe "jo një plan". “E vetmja zgjidhje e qëndrueshme është një zgjidhje diplomatike e qëndrueshme. Një armëpushim dyjavor, veçanërisht një armëpushim kaq i brishtë sa ky, nuk është strategji. Nuk është një zgjidhje diplomatike. Nuk është një plan”, tha Schumer. Ai theksoi se nuk beson se administrata po i jep Kongresit një "përgjigje të kënaqshme" për qëllimin e saj përfundimtar.