Ish-presidenti Hashim Thaçi ka lënë përkohësisht qelinë në Hagë, për një vizitë familjare në Kosovë. Nga Gjykata Speciale kanë konfirmuar për mediat kosovare se Thaçit i është aprovuar ardhja në Kosovë për shkak të arsyeve bindëse. Gjithashtu mësohet se Thaçi do të jetë nën kujdesin e Policisë së Kosovës dhe EULEX gjatë kësaj vizite. “Për shkak të arsyeve bindëse humanitare, Trupi Gjykues ka udhëzuar Sekretarin që të menaxhojë një vizitë paraburgimi në Kosovë për Hashim Thaçin për të takuar familjen. I akuzuari mbetet në paraburgim nga Dhomat e Specializuara. EULEX-i dhe Policia e Kosovës po mbështesin Dhomat e Specializuara të Kosovës”, thuhet në përgjigjen e Dhomave të Specializuara të Kosovës në Hagë. Ditë më parë është raportuar se babai i ish-presidentit, prej kohësh është i sëmurë. Edhe në maj të këtij viti Thaçit i ishte mundësuar vizita në Kosovë për shkak të gjendjes së rënduar të nënës së tij.