Ministrja e Energjisë dhe Infrastrukturës, Belinda Balluku, gjatë një inspektimi në terren ka njoftuar se është hapur dhe një aks tjetër i Unazës së Madhe në Tiranë. Balluku e shoqëruar nga drejtori i Autoritetit Rrugor Shqiptar, Ergys Vjerdho, kanë njoftuar se segment do të jetë i hapur për të gjithë qytetarët. “Hapet për qarkullimin e automjeteve një tjetër aks i Unazës së Madhe të Tiranës. Duke nisur nga ora 14:00 segmenti nga Rrethrrotullimi i TEG deri tek mbikalimi i Farkës do të jetë i aksesueshëm për të gjitha automjetet“, njofton ministrja në një postim në mediat sociale. Teksa inspektoi këtë segment rrugor, ministrja tha se për disa ditë me radhë do të ketë prezencë të shtuar të policëve për të disiplinuar drejtuesit e mjeteve. Për pak ditë do të hapet dhe tuneli tjetër tek “Shqiponja” dhe për ministren ky tunel do të lehtësojë shumë trafikun në atë zone, por edhe në Tiranë në tërësi.