Ngricat për shkak të reshjeve të shumta të dëborës i kanë marrë jetën një tjetër të moshuare në Peshkopi. Ngjarja e rëndë është shënuar pasditen e së dielës në fshatin Limjan të Njësisë Administrative Kastriot të Dibrës. E moshuara e sëmurë, humbi jetën rrugës për në spitalin Rajonal të Dibrës, ku po transportohej me një makinë private, por kjo ka ngecur për shkak të dëborës që kishte bllokuar rrugën. Të rinj të fshatit kanë ndihmuar me lopata për hapjen e rrugës, por ka qenë e pamundur të mundësonin lëvizjen në kohë të fuoristradës. E moshuara nuk ka mundur të përballojë edhe të ftohtin e acartë, duke ndërruar jetë pa mbërritur në spital. Sakaq, po kete të dielën edhe nje tjetër e moshuar humbi jetën teksa transportohej nga Saranda për në spitalet Covid në Tiranë, kur ambulanca doli nga rruga për shkak të ngricës dhe u përplas me murin.