Greqia ka ndaluar lëvizjen e dhive dhe deleve jashtë fermave të tyre për të luftuar një shpërthim vdekjeprurës të "murtajës së dhive". Ministri i Bujqësisë dhe Zhvillimit Rural, Kostas Tsiaras, njoftoi ndalimin e therjes të dhive dhe deleve si edhe lëvizjen për riprodhim në të gjithë vendin. Ky vendim zgjeroi masat tashmë në fuqi në pjesë të Greqisë qendrore ku u raportua për herë të parë shpërthimi. Virusi, i njohur gjithashtu si peste des petits ruminants (PPR), është shumë ngjitës dhe shkakton sëmundje të rënda dhe vdekje te dhitë dhe delet. Nuk prek njerëzit, por mund të vrasë deri në 70% të dhive dhe deleve të infektuara. Rreth 7,000 kokë bagëti në tufat ku është identifikuar sëmundja janë asgjësuar deri më tani në rajonin qendror të Thesalisë, që është edhe më i godituri. 1,200 krerë të tjerë do të asgjësohen më vonë këtë javë, tha guvernatori rajonal Dimitris Kouretas. “Shtrëngimi i masave të sigurisë në të gjithë vendin konsiderohet i nevojshëm për arsye parandaluese dhe synon kufizimin e përhapjes dhe zhdukjen e sëmundjes”, thuhet në një deklaratë të Ministrisë së Bujqësisë. Sapo zbulohet një rast, e gjithë kopeja vritet, ferma e prekur dezinfektohet dhe kafshët në zonat përreth testohen për sëmundjen, në përputhje me protokollet e Bashkimit Evropian. PPR u regjistrua për herë të parë në Bregun e Fildishtë në 1942. Që atëherë është përhapur në mbarë botën, me Organizatën e Ushqimit dhe Bujqësisë të Kombeve të Bashkuara që vlerëson se ka cuar në humbjen e deri 2.1 miliardë dollarëve globalisht, çdo vit.