I dërguari i Shtëpisë së Bardhë për dialogun ndërmjet Kosovës dhe Serbisë, Richard Grenell, njoftoi se qeveritë e këtyre dy vendeve kanë rënë dakort që përfaqësues të tyre të takohen në 27 qershor në Shtëpinë e Bardhë. Përmes një postimi në Tëitter, Grenell tha gjithashtu se Serbia ka pranuar të pezullojë përkohësisht fushatën e tërheqjes së njohjeve të pavarësisë së Kosovës dhe përpjekeve të saj për të kërkuar anëtarësime ndërkombëtare. “Lajm i mirë. Sapo mora angazhimin e qeverive të Kosovës dhe Serbisë që të takohen në Uashington DC, në Shtëpinë e Bardhë në 27 qershor, për të biseduar për dialogun. Nëse njëra palë nuk është e kënaqur me këto bisedime, ato mund të kthehen sërish në status quo, pasi të largohen nga Uashingtoni. Siç kemi thënë vazhdimisht, ne së pari duhet të arrijmë përparim në rritjen e ekonomive. Ky është fokusi. I mirëpres këto diskutime”, ka shkruar Grenell në Tëitter. REL mësoi se në takimin në Shtëpinë e Bardhë, Kosova do të përfaqësohet nga presidenti, Hashim Thaçi dhe kryeministri, Avdullah Hoti. Në fillim të muajit, Qeveria e re e Kosovës shfuqizoi masat e reciprocitetit ndaj Serbisë dhe tha se pret që Serbia të ndalë fushatën e çnjohjeve, me qëllimin që t’i jepet një shans dialogut.