Pretendime për tjetërsim të votës në zgjedhjet për bashkinë e Himarës janë ngritur edhe në Komisionin Europian. Manolis Kefalogiannis, eurodeputet i Demokracisë së Re, njëherësh edhe president i Komisionit BE-Shqipëri për periudhën 2019-2024, ka depozituar disa pyetje në komisionin europian lidhur me çështjen e pronave në Himarë dhe procesin zgjedhor të 4 gushtit. Kefalogiannis, i cili njihet për një retorikë anti shqiptare, shprehet në dokumentin drejtuar komisionit europian se ankesat që janë bërë në lidhje me kushtet e përsëritjes së zgjedhjeve lokale në Himarrë, ngrenë dyshime serioze për integritetin e procesit zgjedhor. Sipas tij, kjo çështje lidhet edhe me mbrojtjen e pronave të pakicës kombëtare greke në Bashkinë Himarës dhe akuzat për shpronësime të paligjshme nga autoritetet shqiptare. Ndër të tjera, europuteti përmend edhe denoncimet për tentativa të ndryshimit të rezultatit elektoral duke regjistruar votues të rinj si dhe ndalimin për ushtrimin e të drejtës së votë të qytetarëve që u kishte kaluar afati i skadencës së kartave të identitetit. Një vitë më parë, Kefalogiannis vizitoi Shqipërinë për të takuar në burg Fredi Belerin, duke e konsideruar lirimin e tij si një ndër prioritetet e axhendës së tij. Më herët Kefalogiannis ka qenë i zëshëm edhe për çështjet e pronave apo edhe të detit, ku ka mbajtur një qëndrim kundërshtues ndaj Çamërisë.