Mbyllja e kufijve dhe izolimi nga pandemia, nuk e ka ulur fluksin e emigrantëve të paligjshëm që kalojnë në Shqipëri tranzit drejt vendeve të Bashkimit Evropian. Rritja e këtij fluksi konfirmohet që prej vitit 2019 e në vijim dhe është shoqëruar me shtimin e personave që e kanë kthyer në biznes transportin e tyre brenda territorit shqiptar. Së fundi raportohet edhe përfshirja e grave dhe personave në moshë gjithnjë e më të re në “dhënien e ndihmës për kalim të paligjshëm të kufirit” apo transportimin e refugjatëve kundrejt pagesës 100-200 euro për person. Policia vendore e Elbasanit konfirmon shtimin e këtij fenomeni, por Policia e Shtetit zyrtarisht refuzon të japë të dhëna mbi situatën e krijuar në shkallë vendi, ndonëse nën zë e pohojnë një fakt të tillë. Në një raport të vitit 2019 nga Shërbimi Informativ Shtetëror, raport që është dërguar edhe në Kuvend dhe institucione të tjerë ligjzbatuese theksohet se Shqipëria vijon të mbetet vend tranzit për kalimin e emigrantëve të paligjshëm. “Fluksi i emigrantëve të paligjshëm që kanë hyrë nëpërmjet kufirit të gjelbër, në jug dhe juglindje të Shqipërisë, ka shënuar rritje”- citon raporti. Nga ana tjetër të dhënat e këtij raporti konfirmohen edhe nga shifrat e INSTAT. Sipas këtij institucioni në 2019-n rezultojnë 6557 azilkërkues në Shqipëri, numër që ka pësuar rritje me 49. 5 për qind, krahasuar me 2018-n.