Ukraina goditi bazën strategjike të bombarduesve rusë, Engels, të enjten me dronë, duke shkaktuar një shpërthim të madh dhe zjarr rreth 700 km larg nga vija e frontit të luftës, raportuan zyrtarët rusë dhe mediat. Një video e paverifikuar në kanalet ruse në Telegram, tregoi një shpërthim të madh në fushën ajrore, që u përhap shpejt dhe shkatërroi edhe ndërtesat aty pranë. Videoja tregoi një shtëllungë tymi që ngrihej mbi shtëpitë e dëmtuara. Baza në Engels, e cila daton në kohët e hershme sovjetike, mban bombarduesit e rëndë strategjikë të Rusisë Tupolev Tu-160 me aftësi bërthamore, të njohur jozyrtarisht si Mjellmat e Bardha. Roman Busargin, guvernatori i Saratovit, tha se kishte pasur një sulm ukrainas me dron në qytetin Engels që kishte shkaktuar një zjarr në aeroport dhe se banorët përreth ishin evakuuar. Ai nuk përmendi në mënyrë specifike bazën e Engelsit, por ajo është fusha kryesore ajrore në zonë. Kreu i qarkut Engels, Maxim Leonov tha se ishte shpallur gjendja e jashtëzakonshme lokale, por nuk dha më shumë detaje.