Gjyqtari Astrit Kalaja u vra nga pakujdesia, neglizhenca dhe moszbatimi i detyrave të punonjësit të sigurisë të ngarkuar me përgjegjësinë për të kontrolluar sinjalizimet e pajisjes së metaleve. Policia e Shtetit doli me një deklaratë duke sqaruar se Elvis Shkambi dhe Gjon Shkambi kanë kaluar në pajisjen e detektimit të metaleve në orën 13 e 42 minuta. Sipas policisë, ekrani i detektorit është sinjalizuar prezenca e metaleve duke ndezur dritat e kuqe, por shtetasi Banush Koxhaj, 63 vjeç, me detyrë punonjës sigurie pranë Gjykatës së Apelit në Tiranë ka qëndruar ulur në karrige dhe nuk ka kryer asnjë veprim për kontrollin fizik të Elvis Shkambit dhe xhaxhait të tij, Gjon Shkëmbi. Përveç, kësaj ata as janë regjistruar në librin e protokollit, ku duhet të evidentohen të gjithë personat që hyjnë dhe dalin nga mjediset e gjykatës. Gati dy orë më vonë, kamerat e sigurisë kanë fiksuar shtetasit Elvis Shkambi dhe Gjon Shkambi në hollin e gjykatës në pritje të nisjes së seancës gjyqësore. Në orën 15 e 29 minuta ata hyjnë në sallën e zhvillimit të seancës, ku për 5 minuta gjyqtari i ndjerë, Astrit Kalaja lexoi vendimmarrjen kundër tyre.